Harold na Gouritsrivier

Ek kom 06:20 aan die gang. Die eerste ding wat ek “beproef” is my knie, wat vanoggend heelwat beter voel. Ek is bewus van hom, maar dit pla my nie so baie soos die vorige dag nie. Die volle afstand vir die dag is 120 km en dit is, grotendeels, deel van die 36ONE se roete. Met die 36ONE word dit egter in die nag gery en nou kry ek die geleentheid om in die dag te sien hoe die wêreld lyk. 

 

Die weer is goed en ek ry rustig. Toe ek deur Zebra ry, hoor ek ‘n “ping”. Ek hou stil maar sien niks wat die geluid kon gemaak het nie. Dit het egter vir my net soos ‘n speek wat gebreek het, geklink. Ek hoor dan ook na ‘n rukkie later iets wat soos ‘n gebreekte speek klink. Ek hou stil en stel vas dat ek wel ‘n speek gebreek het. Gelukkig is dit nie ernstig nie en kan ek sonder probleme aan ry. 

Ek bereik Volmoed na 4:36 en 56 km. Ek het al, met vorige geleenthede, ‘n paar keer by La Plume op Volmoed gestop, maar die diens was so swak dat ek besluit om eder ‘n winkel te soek. Daar is egter niks anders beskikbaar nie en ek moet maar, noodgedwonge, weer La Plume toe gaan. Word ek nie aangenaam verras nie! Die brooedjie wat hulle aanbied is uit die boonste rakke en ek is binne 30 minute weer op die pad. 

 

Terwyl ek daar sit en rus, loer ek oop WhatsApp en sien dat Leonico net ander kant Uniondale is. Ek skat dat ons so om en by Gouritsrivier by mekaar sal uit kom, aangesien hy van Heimersrivier af dieselfde pad as ek ry. Net na Volmoed is daar ‘n klim van 8 km. Nie baie styl nie, maar aanhoudend! Bo loer ek waar Leonico is en sien dat by Kandelaarsrivier is. Intussen karring ek maar voort. Op 75 km hoor ek ‘n motor agter my en aanvaar dat dit een van die “locals” is. My verbasing is groot toe ek sien dat dit Leonico is. Hy hou langs my stil. Ek sê vir hom dat ek nou ‘n probleem het. Hy snap dadelik wat ek bedoel en sê, “ja teen die onderkant van die bult”! Die bult is toe 5 km lank en dit is alles afdraand! Onder by die spruit stop ek en laai my fiets in die motor. Met ‘n knie wat nie 100% is nie en kan doen met ‘n bietjie rus, is dit sekerlik die beter besluit. Met 80 km vir die dag en 7:40 in die saal was dit 'n goeie uitstappie. Dit is nog 40 km van Vanwyksdorp af en 21 km na Gouritsrivier toe. Net voor ons oor die Gouritsrivier gaan is daar ‘n huis op linkerkant waar ek in April 2021 water gesoek het. Ons stop gou hier en ek bevestig dat daar wel ‘n watertenk buite is, so indien ek April hier deurkom  kan ons ons waterbottels hier volmaak. Die Gouritsrivier loop ook so sterk dat ek self daar water kan kry, maar dit is ‘n ope vraag of dit nog die geval in April sal wees. 

 

Ons kom net voor 16:00 op Rooiberg aan waar ons afpak, lekker rus en ‘n heelike aandete kry. Ek sou graag einde April hier wou bly, maar hulle het daardie week ‘n konverensie en is dus vol.

 

So eindig die “recci”. Alhoewel ek nie die volle afstand van 480 km gedoen het nie. Het ek ‘n goeie 4 dae se oefening in gekry. Ek het ook die gewig van my rugsak reg gekry.

Hoekwil na Harold

Hennie het ‘n vriend in Natures Valley wat op 17 Februarie 80 word. Indien ons die volle afstand ry sou hulle seker eers na 20:00 by die partyjie aangekom het. Die vriend het reeds die funksie van die middag na die aand geskuif om vir Hennie te akkommodeer. Ek maak dus die voorstel dan ons die volgende oggend almal saam ontbyt eet en dan Hoekwil toe ry met die motor, waar Helena ons aflaai en dan begin ons rit daar. Op die manier sal hulle dan op ‘n meer redelike tyd by hulle verjaardag funksie opdaag.

 

So gesê, so gemaak en ons begin 08:40 trap. Ek en Hennie het al van Phantompas, Knysna tot by George gery, so ons ken die pad, maar dit bly ‘n mooi pad om te ry. Daar is egter nie veel geyk gedeeltes nie en ons moet óf op óf af gaan. ‘n Gedeelte van die pad is vir voetuie gesluit as gevolg van vloed skade, maar vir fietse is dit nie ‘n probleem nie. 

 

Ek kom  na ‘n ruk agter dat my linker knie nie “lekker” is nie. Dit is nie onthoudbaar nie, maar dit pla my wanneer ek trap en veroorsaak dat ek nie so lekker kan klim nie, en Montagupas lê nog voor! Ek het gelukkig “Deep Heat” in my sak en wanneer ons in George stop vir koffie, smeer ek my knie in.

 

Na die koffie is daar so ‘n entjie tot aan die voet van die Montagupas en dan begin die groot klim vir die dag. Die pas begin na 26 km en ons klim begin by 223 meter. Dit is 11 km lank en ons klim 494 meter. ‘n Gedeelte van die pas is vir verkeer gesluit as gevolg van vloed skade, maar ons verbasing is groot toe ‘n MG B, oppad af, op die pas raak loop! Gelukkig is sy grondvry hoogte van so ‘n aard dat hy al die hindernisse kan aandurf. My seer knie veroorsaak dat ek ‘n gedeelte van die pas stap. Gelukkig pla die knie glad nie wanneer ek stap nie. Dit neem ons 2 uur om die 11 km af te lê. Die ou treinspoor loop langs die pas teen die bopunt en ons verbasing is groot toe ons ‘n trein hoor ry. Ons sien  toe ook twee trokke ry en sal later vasstel dat dit ‘n toeriste atraksie is en dat hulle mense tot bo neem en dan ‘n gedeelte af ry tot by ‘n plek waar hulle dan piekniek hou! 

 

Anderkant is my knie ‘n groot probleem en kan ek byna nie eers op die gelykpad behoorlik trap nie! Ek oorleef dit darem en na 4:58 en 41.91 km met 1,082 meter se klim kom ons by Over the Mounain in Harold aan. Dit is nou 14:00 en Hennie-hulle kan rustig deur ry Natures Valley toe vir hulle partyjie.

 

Uniondale na Knysna

Ek en Hennie val 05:50 in die pad. Hennie jaag vooruit met die woorde “vol my ek ken die pad”! On gelukkig ken hy toe nie die pad nie en ry by die Avontuur afdraai verby oppad na die N9. Gelukkig hoor hy toe ek hom roep en draai om soda tons direk Avontuur toe kan ry. Die eerste 9 km tot by die Langkloof pad is teer en ons klim van 734 meter to by 881. Na so ‘n entjie op die Langkloofpad draai ons links na Prins Alfredpas en klim tot by 1,048 meter oor ‘n verdere 6 km. Dit word gevolg deur ‘n 14 km afdraand tot by De Vlugt.

Hier stop ons vir koffie en ‘n versnapping en durf dan die klim oor die volgende 25 km aan. Gelukkig is daar darem ‘n paar afdraandjies, maar meeste van die tyd klim ons. Gelukkig is die gradient redelik en ons klim maar net van 298 tot 546 meter oor die afstand. Die lug begin klam raak en later moet ons stop om reën klere aan te trek. Teen die laaste bult uit trek die lug oop en ek sien uit na ‘n lekker sonnige rit af Knysna toe!

 

Ongelukkig word my hoop gou verydel. Ons kry eers weer ‘n lekker 5 km afdraand, maar aan die onderpunt draai die pad regs die Knysna woude in. Dit is as of die draai sê “tot hie ren nie verder nie” want skielik reën dit baie hard. Die reën baadjie wat ek het is “antiek” en nie meer 100% waterdig nie, met die gevolg dat ek redelik gou deurnat is. Ek mnou en dan hou dit op met reẽn net om gevolg te word deur nog ‘n bui. Toe ons by Kom se Pad, waarlangs ons van plan was om te ry, kom, besluit ons om maar erder die 23 km reguit Knysna toe te ry erder as om Gouda om te ry wat 33 km sou wees! Die reën hou op ‘n stadium so op dat Hennie stil hou en sy reën baadjie uittrek. Net voor ons by die N2 kom trek hy dit weer aan toe hy sien hoe donker die lug na die Weste is. Toe ons Knysna binne ry, word ons begroet met ‘n “mini” wolkbreuk. Dit reën so hart dat die stormwater dreine nie al die water kan weg neem nie. Ons maak dit darem veilig tot by Lagoon Lodge, waar ons “ontdooi”onder ‘n lekker warm stort. Die harde reën het intussen sommer ons fietse ook vir ons “gewas” na die modder. Dag twee in die sakkie en weer ‘n paar km te kort, maar wat is ‘n plan indien jy hom nie kan aanpas nie! 87.53 km in 7:34 met 1,040 meter se klim. 

Marlu na Uniondale

Ek het besluit om my BB2BB2 roete van Marlu na Vanwyksdorp te "toets" vanaf 15-18/02. Ek reēl met Leonico om saam te gaan sodat hy my motor van Marlu na Vanwyksdorp kan bring. Terwyl ek dan die eerste drie dae ry, kuier hy op Marlu. So gesê, so gemaak! Ek kry hom Woensdag 14/02 en ons vat die pad Marlu toe. Ons kom so tussen 16:00-17:00 daar aan. Kuier en eet die aand lekker. 

 

Dinderdagoggend 05:45 val ek in die pad. Die weer lyk goed, maar Martin het gewaarsku dat daar 'n weste wind gaan waai. Ek ry baie voorspoedig en draai na 77 km en 6 ure se ry links op die R332.

Ek stop vir 11 minute om iets te eet en bene te rek en dan is ek weer oppad. So 10 km die pad af is daar 'n plaas waar ek in die verlede water gekry het en ek laat weer my waterbottel daar volmaak. Net nadat ek regs draai waar die pad vurk met links die Baviaanskloof en regs na die N9, begin dit liggies reën. Ek hou stil om reën klere aan te trek. Binne 5 km raak dit so warm en in tussen het die reën verdwyn, dat ek verplig is om weer stil te hou en uit te trek. 

 

Na 'n verdere 14 km en 1:05 se ry draai ek weer links in Uniondale se rigting op die Hartbeesfontein pad. Die wind druk nou sterk van voor en ek het 'n 7 km bult om te oorwin! Anderkant stop ek weer by 'n plaas om my waterbottel vol te maak. Die pad is baie op en af met min gelyk stukke, maar die padoppervlakte is goed. Met nog 29 km Uniondale toe, begin dit weer reën. Dit is nou 17:15 en teen die pas met die wind gaan ek nie voor 20:30 klaar maak nie. My telefoon lui! Dit is Hennie de Clercq, wat van volgende dag saam net my ry en die aand in Uniondale oor slaap. Hy wil weet of hy my moet kom haal. Als inaggenome, aanvaar ek sy aanbod en met 24 km oor Uniondale toe, kruis ons paaie en ry ek saam met hom en Helena ek sy Fortuner. Die aand eet ons lekker pizza by die restourant langs die gastehuis. So eindig dag 1 van hierdie avontuur.

Trail Seeker - Banhoek

 Saterdag 27 Januarie 2024