KKT Sep 2026 Dag 3

 

Saterdag aand het ons eers lekker rugby gekyk by ons blyplek en toe by Harries gaan eet. Ons reël vir ontbyt by Housemartin maar dit word op naweke eers vanaf 08:00 bedien. Na 'n lekker ontbyt val ons 08:45 in die pad.

Ons ry eers so 'n stukkie op die Willowmore pad en draai net oor die rivier regs om suid-oos agter om De Rust te ry. Die paaie is in 'n baie goeie toestand en wanneer ons wes draai blaas daar 'n lekker windjie van agter. Ons moet oor 'n paar laagwater bruggies, maar by almal is die water onder die pad oppervlakte. Met die wind van agter handhaaf ons 'n goeie pas. Daar is ook nie enige ernstige bulte nie. Ride with GPS laat ons 'n paar draaie ry net na Dyseldorp. Bo op die bult net voor die Kamanassiedam wil hy ons weer deur die "veld" neem en ek besluit om by die groot pad te hou. 

Dit bring ons by die teerpad na Karoo Lusern Slaghuis uit. Die is ongelukkig toe, anders het ons vir biltong en droeëwors gestop. Die ander voordeel is dat ons nou in Oudtshoorn 'n draai kan maak vir lekker koffie! Daar is toevallig 'n fiets wedren by die Emporium met die gevolg dat daar kos stalletjies is en my vriend Johan Breunissen het ook 'n Beans About Coffee stalletjie om vir die lekker koffie te sorg. Ons loop ook vir Fred van Zyl en sy vrou daar raak! Die 53 km van De Rust tot by Oudtshoorn het ons 2:49 geneem en ons stop hier duur 38 minute. 

Ons val weer in die pad en net oor die Olifantsrivier draai ons regs op die Bakenskraalpad. Al langs die rivier af tot by die R328. Dan regs vir so 1 km en dan weer links op 'n grondpad wat weereens in 'n baie goeie toestand is. Net voor De Hoop sluit ons by die ou R62 aan. Dit was oorspronklik 'n semenrpad, maar nou is dit teer. Met die wind van agter handhaaf ons 'n spoed van so om en by 30 kpu. 

Na 10 kilometer draai ons links op 'n grondpad wat ons nader aan die Gamkaberg neem. Al teen die kant van die tot by die Hoogkraalpad, waar ons weer regs gaan. Na so 1 km kom ons by die Olifantsrivier wat hier die pad vol lê. Ons probeer deur ry maar toe die water my bobene bereik besef ek dat daar geen manier is waarop die e-fietse hier gaan deur kom nie. Ons is verplig om Calitsdorp Spa om te ry. By die Spa sien ons die waterskade. Die opdrifsels lê op die eerste verdieping van die gebou by die ingang!   

Ons ry oor die laagwaterbrug na die Spa en Hasie en Johan ry vooruit en mis die Vanwyksdorp afdraai waar langs ek Calitsdorp toe wou ry. Teen die tyd wat ons hulle aandag kry, besluit ek dat ons maar met die pad moet aanhou tot by die R62 en dan daar langs Calitsdorp toe. Na 'n laaste klim is dit gelyk pad tot in die dorp met 'n laaste kort klim en dan langs Boplaas verby tot by Gasteria Grange waar ons oorbly.

Die pad was toe 'n bietjie langer as beplan, maar die wind van agter het gehelp om die kilos vinnig te laat verby gaan. 130 km en die vandag net 7:23 geneem. 

So eindig nog 'n baie aangename Klein Karoo Toer!

Totale afstand 300.69 km; 24:32:32 totale ry tyd; 4,895 meter geklim.

KKT Sep 2026 Dag 2

Ek en Hasie besluit om weer Swartbergpas aan te pak terwyl Danie en Johan Meiringspoort deur gaan ry. Die afstande is soortgelyk, maar Swartbergpas is 'n baie groter uitdaging.

Ek en Hasie val so 'n rukkie voor 08:00 in die pad. Die weer is uitstekend. Nie te koud nie en geen wind nie. Dit neem ons 2:42 vanaf Prins Albert to by die uitkykpunt voor die Gamkaskloof afdraai, waar ons vir 'n "piekniek" stop. Vandaar na die top van die pas neem 'n verdere 44 minute. Dit is lekker koud hier bo. Waar dit so 9 was toe ons begin het, styg die temperatuur so dat ek halfpad teen die pas op begin warmkkere uittrek. Bo op die pas is dit weer lekker koud en stop ek om weer 'n warm top aan te trek. 

Die 24 km af tot by Wildewandel, waar ons middagete geniet, neem net 54 minute. Hier ontmoet Hasie die eienaar saam met wie hy op Elsenburg gestudeer het. Dit is die eerste keer in 50 jaar dat hulle mekaar weer sien! Na 49 minute val ons weer in die pad.

Ons ry verby die gedeelte waar 70 ton rots die pad Kango Grotte toe onlangs met die groot reën toegeval het. Na 5 km daai ons links op die Oude Muragie pad. Dit begin gelyk en dan het ons gelygelike klimme vir die volgende 15 km. Daar is 'n paar van die bultjies wat kort styl seksies het, maar kan darem alles uit trap. Dan volg 15 km afdraend tot by die N9 net voor De Rust. Ons draai links en ry die vedere 5 km tot in De Rust waar ons by Housemartin oorbly. 

Lekker dag met 1,700 meter se klim oor 84 km wat ons 7:55 geneem het.

KKT Sep 2026 Aanloop en dag 1

Ek en Mike Smit het besluit op 'n Klein Karoo Toer van 3-7 September. Danie en Johan Schoeman sê toe hulle is ook in. Mike tel heup probleme op en Hasie Lourens neem sy plek. Ons ry Donderdag 3 Sep Calitsdorp toe. Johan bederf ons net lekker steak en ons is almal teen 22:00 in droomland!

Daar is ooreengekom dat ons 08:00 sal begin. Ons gasheer is ook 'n fietsryer en hy ry die eerste 14 km saam met ons. Dit blyk ook dat hy 'n plaaslike toergids is en hy vertel ons baie, besonder interessante feite onderwyl ons so deur Groenvallei ry. Ons moet ook 'n paar stoompies, wat lekker sterk loop, oor steek.

By Kruisrivier draai ons links. Terwyl ek so in die pad af ry, sien ek 'n takkie so dik soos my pinkie van 'n bos wat oor die pad hang. Niks ernstig nie en ek ry oor hom. Die volgende oomblik vlieg ek vooroor en tref die pad met my gesig. Die takkie het afgebreek, tussen my speke ingekom en my voorwiel "gelock" wat tot gevolg gehad het dat ek toe vlieg. Gelukkig niks meer as 'n bloedneus, skrape op my gesig en 'n paar "chips" in my voortande, nie. Dit kon baie erger gewees het want dit het so vinnig gebeur ek het nie eers tyd gehad op my hande uit te steek nie! Klim weer op en ry aan! 

Na net neer as 5 uur kom ons by Kobus se Gat aan die voet van Swartbergpas. Hier is gelukkig 'n toergroep en hulle "noodhulp" man ontsmet al my "wonde" en plak pleisters op. Na 'n koppie koffie is ek en Hasie oppad. Danie, wat vandag met sy "e-bike" ry moet sy battery laai, so hy en Johan bly agter.

Die klim van Kobus se Gat tot bo is 12 km en ek skat dit sal ons so 2 uur neem. Daar is baie verkeer want Meiringspoort is nog gesluit. Die eerste 10 km se gradiënt wissel so tussen 4-12% en ons handhaaf 'n goeie pas. Die wind is ook nou van agter. Halfpad stop ek om 'n warmtop en handskoene aan te trek. Die temperatuur staan op 8.5 grade Celsius! Dit laaste kilometer raak net te styl en ek stoot. Na 1:52 is ek bo! Nou is dit 'n stukkie afdraend, 'n klein klim en dan afdraend tot by Yellow House in Prins Albert waar ons bly. Daar is 'n paar rowwe stukke maar oor die algemeen is die pad goed. Hasie sê hy ry stadig afdreandes en ek gaan vooruit. 

Van die laaste klim tot by Yellow House hoef ek nie te trap nie, behalwe vir die twee stroompies waar ek moet deur. 

Na 8:13 en 87 km trek ek by Yellow House in. Hasie kom so 15 minute later daar aan en die twee "e-bikes" so 'n halfuur later. Die dag word afgesluit net kekker "lamb shanks" en ons is 21:00 in die bed!